Wedi ei bostio ar Dydd Gwener 21 Chwefror 2025
Rhoddodd gwirfoddolwyr yn Neuadd y Gweithwyr Blaenafon dros 3,000 awr o wirfoddoli y llynedd - mwy na 60 awr yr wythnos!
Treuliodd y 22 o wirfoddolwyr gyfanswm o 3,200 o oriau yn cynnal amrywiaeth eang o weithgareddau, gan gynnwys grwpiau crefft a lles, sinema, cerddoriaeth fyw a pherfformiadau theatr - cynnydd o 30 y cant o'i gymharu â'r flwyddyn flaenorol.
Ym mis Tachwedd, rhoddwyd Gwobr Ddinesig iddynt gan Gyngor Torfaen am eu hymroddiad at gynnal a chadw'r neuadd, yn y Stryd Fawr.
Mae bwrdd Neuadd Gweithwyr Blaenafon nawr yn gobeithio denu mwy o wirfoddolwyr i helpu i gynyddu nifer y digwyddiadau eleni.
Maen nhw’n un o'r grwpiau diweddaraf i gofrestru ar wefan Cysylltu Torfaen, lle mae ganddyn nhw nifer o ddigwyddiadau a chyfleoedd gwirfoddoli wedi'u rhestru.
Dywedodd Wendy Horler, sydd wedi gwirfoddoli yn y neuadd ers bron i flwyddyn: "Mae'n werth chweil pan allwch chi wneud diwrnod arbennig rhywun hyd yn oed yn fwy arbennig, yn enwedig yn ystod priodasau a dathliadau."
Dywedodd Emma Harvey, sy'n aelod o'r bwrdd, yn ogystal â bod yn wirfoddolwr ymarferol: "Rwyf wrth fy modd yn gwirfoddoli yn y neuadd ac yn gallu cymryd rhan mewn ystod amrywiol o bethau.
"Rwy'n arbennig o frwd dros y grŵp Knit and Natter, y gwnes i helpu ei sefydlu. Rwyf wedi gweld cyfeillgarwch yn ffurfio ymhlith pobl o bob oed, ac mae'r sgiliau sy'n cael eu rhannu ar draws cenedlaethau yn galonogol i'w gweld."
Dywedodd Andrea Roberts, a oedd yn myfyrio am ei thaith bersonol: "Ymunais gyntaf i wirfoddoli yn y sinema, gan fod fy nau riant yn gweithio yno am y rhan fwyaf o'u bywydau - fy nhad fel Prif Daflunydd a fy mam fel derbynnydd arian a thywyswraig.
"Rwy'n gwirfoddoli i wneud beth bynnag sydd ei angen, ac mae wedi rhoi mwy o sgiliau a llawer o hyder i mi. Rwy'n mwynhau gweithio yno gan eu bod i gyd yn bobl hyfryd, ac rydym yn chwerthin."
Dywedodd Sharon Ford, Cadeirydd Bwrdd Neuadd y Gweithwyr a gwirfoddolwr: "Heb ein gwirfoddolwyr, ni fyddem yn gallu darparu'r amrywiaeth o ddigwyddiadau a gweithgareddau sydd gennym. Mae cymaint yn digwydd na allai ddigwydd pe na bai pobl yn rhoi o'u hamser, felly hoffwn ddiolch yn bersonol i bawb a gymerodd ran yn y gwaith o wneud hyn yn llwyddiant ysgubol."
Mae’n hysbys iawn bod gwirfoddoli nid yn unig yn fuddiol i les pobl ond hefyd yn meithrin ymdeimlad cryf o gymuned.
Mae astudiaeth ddiweddar gan y Cyngor Cenedlaethol ar gyfer Sefydliadau Gwirfoddol yn tynnu sylw at effaith gadarnhaol gwirfoddoli ar iechyd meddwl a chysylltiadau cymdeithasol, gyda dros dri chwarter y gwirfoddolwyr yn nodi gwell iechyd meddwl a lles.
Am fwy o wybodaeth, cysylltwch â Sharon Ford ar 01495 792661 neu ewch i wefan Cysylltu Torfaen - https://connecttorfaen.org.uk/